Núdọdomẹ vivẹ lẹ sọn sisósisó ayiha ṣie tọn mẹ hlan nọvisunnu po nọviyọnnu lẹ po to aihọn lẹpo mẹ, to Oyín vivẹ Oklunọ podọ Whlẹngantọ mítọn Jesu Klisti tọn tọn mẹ po owéfọ he po sọn Owé 1 JOHANU 2, afọ 27 tọn mẹ, dọmọ:

“Ṣigba amìsisá he mì ko yí to e de nọte to mì mẹ, mì ma sọ din mẹde ni plọ́n mì gba; ṣigba lé amìsisá lọ to mì plọ́n gbọn onú lẹpo tọn dali, bọ e sọ yín nugbo dó, bo ma yín lalo, kẹdẹdilé é plọ́n mì dó, mìwlẹ ni sọ nọte to e mẹ.”

Na ohó helẹ ni biọ sisósisó ayiha dopodopo mítọn tọn mẹ bo sọ lẹzùn nugbo! To amìsisá nugbo lọ po gbọdemẹ Gbigbọ Wiwé tọn po glọ́, yẹwhegán lẹ tindo jlọjẹ nado dọ Titò Whlẹngan tọn lẹpo jẹnukọn to Ohó Jiwheyẹwhe tọn mẹ. Amìsisá dopo nẹ lọ tin to Oklunọ mítọn ji. Ewọ yín Klisti, yèdọ Mẹdidè lọ. To Owé LUKU 4:18-19 tọn mẹ, Whlẹngantọ mítọn hia ohó sọn Owé ISAIA 61:1-2 tọn mẹ, dọmọ: “Gbigbọ Oklunọ JIWHEYẸWHE tọn tin to oji é; na OKLUNỌ ko yí amìsisá do dè mi nado dọyẹwhehó wẹndagbe tọn hlan homẹmimiọnnọ lẹ; é ko do mi hlan nado basi pọ́ngbọ ayiha awublanọ tọn, nado lá mẹdekannujẹ hlan mẹmẹglọ lẹ, podọ hùnhùn ogànhọ̀ tọn na ogàntọ lẹ. Nado lá owhèalọkẹyí OKLUNỌ tọn…” Podọ míwlẹ, kẹdẹdi yisenọ nugbo lẹ, ko kẹalọyí Gbigbọ dopolọ, amìsisá dopolọ, oplọ́n dopolọ, podọ núdohiamẹ Jesu Klisti tọn dopolọ.

Paul mẹhe mọ oylọ́ nugbo de yí, tin to amìsisá po gbọdemẹ Gbigbọ Jiwheyẹwhe tọn po glọ́, bo sọ tindo kàndeji gbèdidè Ohó lọ tọn sọmọ bọ é dọ, dọmọ, “Mẹdepope he dọyẹwhehó wẹndagbe devo de tọn tin to dẹ̀hodo glọ́” (GALATIA 1:8). William Branham, mẹhe yín omẹ Jiwheyẹwhe tọn to azán mítọn mẹ, sọ mọ oylọ́ wiwé nugbo de yí ga, bo tin to amìsisá po gbọdemẹ Gbigbọ Wiwé tọn po glọ́, bo sọ dọyẹwhehó wẹndagbe madopòdo lọ tọn. Mọdopolọ wẹ hlan oylọ́ ṣie ga. Dẹnsọlé OKLUNỌ Jiwheyẹwhe dègbè oylọ́ de tọn, Ewọ tindo kàndeji nugbo de to yẹwhegán lẹ, po apọsteli lẹ po, po devizọ́nwàtọ Jiwheyẹwhe tọn he É ko dè do devizọ́n lọ mẹ lẹpo po go. Ohó he OKLUNỌ dọ to Owé JOHANU 20:21 tọn mẹ, gbẹ́sọ to azọ́nwà kaka jẹ egbé, dọ: “Enẹwutu Jesu sọ vọ́ dọ hlan yé, dọ, Jijọho ni tin hlan mì: lé Otọ́ do mi hlan, yèdọ mọwẹ yẹn do mì hlan dó.” Podọ ga, mẹdohlan wiwé de sọ tin to ohó he OKLUNỌ mítọn dọ to Owé JOHANU 13:20 tọn mẹ, dọ: “Nugbo, nugbo, wẹ yẹn dọ hlan mì, Mẹhe yí omẹ depope he yẹn dohlan, é yí mi; mẹhe sọ yí mi, é yí mẹhe do mi hlan.”

Owéfọ he mí hia to bibẹ́nu ohó mítọn tọn, mí mọ dọ Apọsteli Johanu wlán dọ, amìsisá lọ gbẹ́sọ to ninọ̀ ovi Jiwheyẹwhe tọn nugbo lẹ mẹ. É táhinhọ́n do e ji dọ, lalo depope matin to nugbo lọ mẹ gba (1 JOHANU 2:21). Mí hia to afọ kòtọ (20) lọ mẹ dólé dọ: “Ṣigba mì tindo amìsisá de sọn Mẹwiwé lọ de, mì sọ yọ́n onú lẹpo” (1 JOHANU 2:20). Ohó Etọn he É dọ to afọ 28 mẹ, yín didọ hlan dali mítọn to ojlẹ he mẹ, dọmọ: “Podọ dinvie, mì yọpọ emi, mì nọte to ewọ mẹ; na, whenuena é na sọawúhia, mì nido tindo tudido, bo ma nasọ kuwinyan to nukọn etọn to gigọ̀wá etọn whenu” (1 JOHANU 2:28).

Mí omẹ pó to tenọpọ́n Osọhia Jesu Klisti tọn bo sọ jlo nado wléawu to Kọlilẹ́wá Etọn whenu. Na míwlẹ tọn, ohógbè he yín “Mì yọpọ emi, mì nọte to Ewọ mẹ” yín ohógbè vivẹ titegbe de. To Owé JOHANU 15:5 tọn mẹ, Whlẹngantọ mítọn dọ, dọmọ, “… Ewọ he nọnọ̀ yẹn mẹ, podọ yẹn to ewọ mẹ, dopolọ wẹ hẹn sinsẹ́n susu: na jijẹla sọn dẽ mìwlẹ ma sọgan wà núde.”